قصتي مع مودرن اكاديمي .

قصتي مع مودرن اكادمي ( كليه الهندسه )

بسم الله الرحمن الرحيم ابدأ اول كلامي ... واصلي واسلم على اشرف الانبياء والمرسلين سيدنا محمد عليه افضل الصلاه واتم التسليم ...

اولا احب اعرفكم بنفسي ... شاب مصري واسمى ( احمد ) في الـ 18 من عمري ... قضيت منها كثير خارج مصر

وانتهت تلك الاقامه بأنتهاء الدراسه الثانويه عام ( 2008 ) وبدأ النظرفي الحياه الجامعيه ...
بعد انتهاء الامتحانات في الثانويه العامه بدأت بتجهيز اوراق سفري من شهادات واوراق السفر والتذاكر ... الخ
وقررت بصراحه اني التحق باحد الكليات المصريه واستقر في مصر

المهم ...حصل كل حاجه وكلاه تمام التمام ... وسافرت ووصلت مصر الحمد لله
بدأت اسأل عن التنسيق والمعادله للدرجات وكان الكلام ده في اول شهر ( 7 ميلادي او في اواخر شهر 6 تقريبا )
يعني بالمختصر المفيد اثناء امتحانات الثانويه العامه المصريه ... طبعا قالولي استنى لما النتيجه تبان ويخلصو امتحانات والكلام الكتير ده ...

استنيت اسبوع ... اثنين ... ثلاثه ... شهر ... المهم قالو التنسيقات ظهرت . اللي هيا مرحله اولى يعني
قلت الحمد لله ... رحت مكتب التنسيق في القاهره ... قالولي الي وافدين من برا مصر ليهم تنسيق خاص
طيب امته ياجماعه ... قالو تقريبا مع المرحله الـ (3 ) واللي هيا اخر مرحله في التنسيق
طبعا اعصابي خربانه ... وعلى اخرها مهموم وقلقان ومتوتر آآآآآآآآخر حاجه
لاكن سلمت امري لله وقلت يارب .
طبعا انا قلت استغل الفرصه واحاول اقدم في اي كليه وا اكادميه خاصه لحد مالتنسيق يظهر
وطبعا بعد بحث وسؤال مملين ... توصلت لعده جامعات ... حاولت الالتحاق بأحدها لاكن الكل اعترض وطلب انها تكون عن طريق مكتب التنسيق .
طبعا انا اعصابي باظت اكتر ... وقلت يلا مش فارقه
وفي اثناء بحثي ... قبلت بأحد الكليات الخاصه ( بدون ذكر اسماء ) وقالولي خلص الاجرائات وكده وبدون الرجوع لمكتب التنسيق

انا قلت اشطه اوي ... عسلات مربات حلويات .. اسمه انجزنا حاجه
وتاني يوم الصبح صحيت من النوم ... فطرت وروشت وظبتط نفسي ولقيت التلفون بيرن رديت.
وسمعت : صباح الخير يابوحميد
رديت : صباح زي العسل ياعسل
سمعت : بقولك يابوحميد ... فيه اكادميه اسمها مودرن في المعادي
قلتله : ايه نظامها
رد وقالي : تمام وليها سمعه تمام وليا صحابي هناك
قلتله : عسل عسل يلا بينا يلا يامان
عدا عليا بالعربيه وانا خدت اوراقي وظبطت
نزلنا شؤون الطلبه وسحبت الابلكيشن ( طبعا قلت تمام اوي اهو حاجه في الايد ولا 48 في التنسيق )
بعد ما عبيت الابلكيشن وجاي بقدمه ... الموظفه قالتلي ... بس لازم يكون انت مرشح من مكتب التنسيق
احنا هنقبل الابلكيشن دلوقتي ونديك كارنيه ترشيح لعندنا ولما يرشحك مكتب التنسيق تعال ومعاك الكارنيه ده

قلت ييييييييه يادي التنسيق وسنينه الملونه ...
طبعا الكلام ده كله وامتحانات الثانويه المصريه شغاله ...

قلت استنا وامري لله .
بعدها بـ ( 3 ) ايام قلت لازم اقضي صيفي بالطول ولا بالعرض مش معقول اضيعه كده
اتفقت انا والشله ايه يا جماعه على فين ؟
ايه رأيكو في اسكندريه ؟ قالو آمين معاك
طلعنا روشنا وعشنا ايام تمام التمام وقضيناها بالطول والعرض ومن هنا لهنا
خلصنا ورجعنا كل واحد لبيته وانا رجعت لهم التنسيق والتوتر والضغظ النفسي تاني
بعد الكلام ده بحوالي 3 اسابيع
لقيت اللي بيصحيني من النوم وبيقول : مبرووووووووك الف مبروك
قلت خير خير خير
قالو التنسيق ظهر ... قلت اشطه بالموز
نطيت من ع السرير ... شغلت الكمبيوتر ... دخلت السايت ولقيت ( تم ترشيحكه الى مودرن اكادمي .. الاكادميه الحديثه للهندسه والتكنلوجيا بالمعادي ))
قلت الله الله تمااااااااااااام الحمد لله كده تمام اوي
ايه بقا الحوار لسا ما ماتش على كده ...

عاوز انزل مودرن هندسه ... اتبهدلت على ماوصلت ههههههه